खादी एक्स्प्रेस ( ऑनलाईन ) पुणे : पुणे शहरात किरकोळ वादातून टोकाचे पाऊल उचलून हत्या करण्याच्या घटनांनी पुन्हा एकदा खळबळ उडवून दिली आहे. मार्केट यार्ड पोलीस स्टेशनच्या हद्दीत बिबवेवाडी-कोंढवा रोडवर एका २८ वर्षीय तरुणाची बॅट आणि पेव्हर ब्लॉकने ठेचून हत्या करण्यात आली आहे. याप्रकरणी पोलिसांनी एका तरुणाला अटक केली असून दोन अल्पवयीन मुलांना ताब्यात घेतले आहे. दिनांक २० एप्रिल २०२६ रोजी पहाटे ०४:४५ ते ०५:५८. वाजण्याच्या सुमारास मार्केट यार्ड येथील बिबवेवाडी-कोंढवा रोडवरील अश्विनी पॅराडाईज सोसायटी आणि हॉटेल ओम प्युअर व्हेजच्या समोरील सार्वजनिक रस्त्यावर ही घटना घडली.

रोहन कांतीलाल ओव्हाळ (वय २८ वर्षे, रा. काकडे वस्ती, कोंढवा बु.) असे खून झालेल्या तरुणाचे नाव आहे. याप्रकरणी त्यांच्या २५ वर्षीय बहिणीने मार्केट यार्ड पोलीस स्टेशनमध्ये फिर्याद दिली आहे. मिळालेल्या माहितीनुसार, मृत रोहन आणि आरोपी यांच्यात त्यावेळेस कोणत्यातरी कारणावरून तात्काळ वाद झाला होता. या वादाचा राग मनात धरून आरोपींनी रोहनवर हल्ला केला. आरोपींनी रोहनला क्रिकेट बॅटने शरीरावर बेदम मारहाण केली. त्यानंतर रस्त्यावरील पेव्हर ब्लॉक उचलून त्याच्या डोक्यात घालून त्याला गंभीर जखमी केले. या गंभीर दुखापतीमुळे रोहनचा जागीच मृत्यू झाला. मार्केट यार्ड पोलिसांनी कौशल कमलेश लांडगे (वय २० वर्षे, रा. काळेपडळ, हडपसर, पुणे) – अटक, दोन विधिसंघर्षित बालक (अल्पवयीन मुले) – ताब्यात या प्रकरणात तत्परतेने कारवाई करत आरोपींना निष्पन्न केले आहे. याप्रकरणी मार्केट यार्ड पोलीस स्टेशनमध्ये गु.र.नं. ७०/२०२६ अन्वये भारतीय न्याय संहिता (BNS) कलम १०३(१) (खून) आणि ३(५) नुसार गुन्हा दाखल करण्यात आला आहे.

सदर गुन्ह्याचा पुढील तपास वरिष्ठ पोलीस निरीक्षक श्री. विश्वजित जगताप यांच्या मार्गदर्शनाखाली पोलीस पथक करत आहे.