खादी एक्स्प्रेस ( ऑनलाईन ) पुणे : पुणे शहरात राहणाऱ्या एका ५२ वर्षीय नागरिकाची सायबर गुन्हेगारांनी शेअर ट्रेडिंगमध्ये गुंतवणुकीचे आमिष दाखवून तब्बल तीन कोटी सहासष्ट लाख चव्वेचाळीस हजार सहाशे सत्तेचाळीस रुपयांची (₹३,६६,४४,६४७/-) विक्रमी आर्थिक फसवणूक केल्याची घटना उघडकीस आली आहे. ही फसवणूक १५ जुलै २०२५ ते ७ ऑक्टोबर २०२५ या कालावधीत ऑनलाईन माध्यमातून करण्यात आली आहे.

असा झाला कोट्यवधींचा गंडा

हडपसर (पुणे) येथे राहणारे फिर्यादी यांना एका अनोळखी मोबाईल धारकाने संपर्क साधला. आरोपीने फिर्यादीचा विश्वास संपादन केला. आरोपीने त्यांना शेअर ट्रेडिंगच्या विविध योजनांमध्ये मोठी रक्कम गुंतवण्याचे आमिष दाखवले. या गुंतवणुकीवर चांगला आणि त्वरित परतावा मिळेल, असे खोटे आश्वासन आरोपीने दिले. या आमिषाला बळी पडून फिर्यादीने वेळोवेळी आरोपीने सांगितलेल्या खात्यांवर कोट्यवधी रुपयांची रक्कम जमा केली. गुंतवणूक करूनही कोणताही परतावा न मिळाल्याने आणि संपर्क तुटल्यामुळे आपली फसवणूक झाल्याचे फिर्यादीच्या लक्षात आले.

पुणे पोलीस स्टेशनमध्ये गुन्हा दाखल

फसवणुकीची व्याप्ती आणि तांत्रिक गुंतागुंत लक्षात घेऊन, या प्रकरणी पुणे पोलीस स्टेशन येथे गु.र.नं. १०६/२०२५ अन्वये भा.न्या.सं.क. ३१६(५), ३१९(५), ३१८(४), ३(५) आणि आयटी ॲक्ट कलम ६६(बी) नुसार मोबाईल धारक अज्ञात आरोपीविरुद्ध गुन्हा दाखल करण्यात आला आहे.

गुन्ह्याचा तपास वरिष्ठ पोलीस निरीक्षक श्रीमती स्वप्नाली शिंदे या करत आहेत.

सायबर गुन्हेगारांनी देशभरातील नागरिकांना लक्ष्य केले असल्याचे या घटनेतून दिसून येते. या आंतरराज्यीय सायबर गुन्ह्याच्या जाळ्याचा आणि त्यातील आर्थिक व्यवहारांचा सखोल तपास पोलीस करत आहेत. पुणे शहर पोलिसांनी नागरिकांना अशा उच्च परतावा देणाऱ्या ऑनलाईन गुंतवणूक योजनांपासून सावध राहण्याचे पुन्हा एकदा आवाहन केले आहे.