खादी एक्स्प्रेस ( ऑनलाईन ) पुणे: महिलांच्या सुरक्षिततेच्या दृष्टीने एक अत्यंत जलद आणि महत्त्वाची कारवाई हडपसर पोलीस स्टेशनने (Hadapsar Police Station) केली आहे. एका अल्पवयीन मुलीची रिक्षाचालकाने छेडछाड केल्याच्या गंभीर घटनेत, पोलिसांनी केवळ २४ तासांच्या आत तपास पूर्ण करून आरोपीविरुद्ध न्यायालयात दोषारोपपत्र (Charge-sheet) दाखल केले आहे.

घडला प्रकार काय?

दिनांक ०९ ऑक्टोबर २०२५ रोजी फिर्यादी माळवाडी येथून हडपसरकडे प्रवास करत असताना, अग्रवाल स्वीट (सोलापूर रोड, गाडीतळ, हडपसर) येथे त्या एका रिक्षात बसल्या होत्या. त्याचवेळी रिक्षाचालक शैलेश गुंडराव पाटील (वय २९, रा. मांजरी, पुणे) याने फिर्यादीच्या मनात लज्जा उत्पन्न होईल अशा हेतूने घाणेरड्या आणि अश्लील पद्धतीने हात लावून छेडछाड केली. या कृत्यामुळे पीडित मुलीच्या मनात तीव्र संताप निर्माण झाला.

गुन्ह्याचे गांभीर्य ओळखून विशेष पथक

या घटनेचे गांभीर्य ओळखून वरिष्ठ पोलीस निरीक्षक श्री. संजय मोगले यांच्या मार्गदर्शनाखाली आणि पोलीस निरीक्षक (गुन्हे) श्री. निलेश जगदाळे यांच्या देखरेखीखाली तातडीने विशेष तपास पथक नियुक्त करण्यात आले. तपास पथकाचे प्रभारी अधिकारी पोलीस उप-निरीक्षक हसन मुलाणी आणि पोलीस उप-निरीक्षक सत्यवान गेंड यांनी त्वरित तपासाची चक्रे फिरवली.तपास पथकाने परिसरातील सीसीटीव्ही फुटेज जमा केले आणि तांत्रिक विश्लेषण करून आरोपी शैलेश पाटील याची ओळख पटवली आणि त्याला तात्काळ ताब्यात घेतले.

विक्रमी वेळेत तपास पूर्ण

तपास अधिकारी, सहायक पोलीस निरीक्षक हसीन शिकलगार यांनी आरोपीला ताब्यात घेतल्यानंतर, साक्षीदारांचे जबाब नोंदवणे आणि सीसीटीव्ही फुटेजसह इतर पुरावे गोळा करण्याचे काम युद्धपातळीवर पूर्ण केले.महिला व बालकांवरील लैंगिक अत्याचारासारख्या संवेदनशील गुन्ह्यांत तत्काळ न्याय मिळावा, यासाठी पोलिसांनी कठोर परिश्रम घेऊन केवळ २४ तासांच्या आतच आरोपीविरुद्ध मा. न्यायालयात भक्कम दोषारोपपत्र दाखल केले.

मार्गदर्शक अधिकारी: मा. अपर पोलीस आयुक्त श्री. मनोज पाटील, मा. पोलीस उप-आयुक्त डॉ. राजकुमार शिंदे, आणि मा. सहायक पोलीस आयुक्त श्रीमती अनुराधा उदमाले यांच्या मार्गदर्शनाखाली ही उल्लेखनीय कामगिरी पार पडली.

सहभागी पथक: हडपसर पोलीस स्टेशनचे श्री. संजय मोगले आणि श्री. निलेश जगदाळे यांच्या नेतृत्वाखाली स.पो.नि. हसीन शिकलगार, पो.उप.नि. हसन मुलाणी, पो.उप.नि. सत्यवान गेंड आणि अंमलदार संदीप राठोड, अमित साखरे, बापु लोणकर, अभिजीत राऊत, कुंडलीक केसकर, तुकाराम झुंजार, विनोद शिके, संभाजी म्हसगर, स्वप्नाली मोरे, मीरा रंदवे, साधना राठोड, पूनम खामकर व अमोल जाधव यांनी ही कामगिरी यशस्वी केली.

हडपसर पोलिसांच्या या तत्पर कारवाईमुळे महिलांच्या सुरक्षिततेबाबत एक सकारात्मक संदेश समाजात गेला आहे.