खादी एक्स्प्रेस ( ऑनलाईन ) पुणे : पुणे शहर पोलीस दलाच्या गुन्हे शाखेने शहरात ‘पिकपॉकेटिंग’ आणि प्रवाशांच्या पर्स चोरीच्या घटनांवर नियंत्रण मिळवण्यासाठी मोठी कारवाई केली आहे. बसमध्ये गर्दीचा फायदा घेऊन प्रवाशांचे पाकीट आणि बॅग चोरणाऱ्या तीन (०३) महिला आरोपींना गुन्हे शाखेच्या युनिट-४ च्या पथकाने जेरबंद केले आहे. या महिलांकडून चोरीचे सोन्याचे दागिने आणि रोख रक्कम असा एकूण ₹४ लाख १२ हजार २३४ किंमतीचा मुद्देमाल जप्त करण्यात आला आहे.ही कारवाई खडकी पोलीस स्टेशनच्या हद्दीत (संबंधित बस स्टॉप) करण्यात आली. गुन्हे शाखा, युनिट-४ च्या पथकातील पोलीस अंमलदार प्रवीण राजपूत आणि संजय आढारी यांना त्यांच्या गुप्त बातमीदारांमार्फत खात्रीशीर माहिती मिळाली की, बसमध्ये गर्दीचा फायदा घेऊन पाकीट आणि पर्स चोरी करणाऱ्या ०३ महिला वाकडेवाडी (शिवाजीनगर) येथील पीएमटी बस स्टॉपवर थांबलेल्या आहेत.

बातमी मिळताच तात्काळ गुन्हे शाखेच्या युनिट-४ कडील पोलीस पथकाने वाकडेवाडी (शिवाजीनगर) पुणे येथील पीएमटी बस स्टॉपवर जाऊन सापळा रचला. या पथकाने बातमीतील वर्णनानुसारच्या तिन्ही महिलांना शिताफीने ताब्यात घेतले. त्यांची नावे व पत्ते विचारले असता, त्यांनी त्यांची नावे उघड केली: १. आशा देवीदास लोंढे (वय ६०, रा. रेल्वे स्टेशन शेजारी, लोणी काळभोर, पुणे) २. रेखा मनोहर हतांगळे (वय ३५, रा. सदर) ३. हेमा दिगंबर हतांगळे (वय ४१, रा. सदर) सदर महिला आरोपींकडे अधिक चौकशी केली असता, त्यांनी नाशिक ते इस्लामपूर पीएमटी बसने, तसेच मोरे बाग बस स्टँड आणि मांगडेवाडी बस प्रवासादरम्यान गर्दीचा फायदा घेऊन एका महिलेची पर्स चोरल्याची कबुली दिली. त्यांच्याकडून रोख रक्कम ₹१,०००/- (एक हजार रुपये) आणि ₹४,११,२३४/- (चार लाख अकरा हजार दोनशे चौतीस रुपये) किंमतीचे सोन्याचे दागिने असा एकूण ₹४,१२,२३४/- (चार लाख बारा हजार दोनशे चौतीस रुपये) किंमतीचा मुद्देमाल जप्त करण्यात आला आहे.

सदर घटनेबाबत भारती विद्यापीठ पोलीस स्टेशनमध्ये गु.र.क्र. ४७६/२०२५ अन्वये भा.न्या.सं.क. कलम ३०३(२) प्रमाणे गुन्हा दाखल असून, पुढील तपास भारती विद्यापीठ पोलीस स्टेशन करीत आहे. सदरची मोलाची कामगिरी मा. अपर पोलीस आयुक्त, गुन्हे, पुणे शहर श्री. पंकज देशमुख, मा. पोलीस उप-आयुक्त, गुन्हे, पुणे शहर श्री. निखिल पिंगळे, मा. सहाय्यक पोलीस आयुक्त, गुन्हे-१, पुणे शहर श्री. विजयकुमार कुंभार यांच्या मार्गदर्शनाखाली, गुन्हे शाखा, युनिट-४, पुणे शहर कडील वरिष्ठ पोलीस निरीक्षक श्री. जितेंद्र कदम यांच्या सूचनेप्रमाणे पार पाडण्यात आली.

या कार्यवाहीत पोलीस उप-निरीक्षक वैभव मगदुम, पोलीस अंमलदार राजपूत, हरीश मोरे, एकनाथ जोशी, संजय आढारी, प्रवीण भालचीम, विठ्ठल वाव्हळ, भरत गुंडवाड व मयुरी नलावडे यांनी सहभाग घेतला. पुणे गुन्हे शाखेच्या युनिट-४ च्या पथकाने दाखवलेली ही तपास कार्यक्षमतेची आणि जलद कारवाईची पद्धत अत्यंत कौतुकास्पद आहे. यामुळे बस प्रवासादरम्यान चोरीच्या घटनांवर नियंत्रण मिळवण्यासाठी पोलिसांची यंत्रणा किती सक्षम आहे, हे पुन्हा एकदा सिद्ध झाले आहे.