खादी एक्स्प्रेस ( ऑनलाईन ) पुणे : शहरात जुगार आणि प्राण्यांना क्रूर वागणूक देणाऱ्या कृत्यांना वानवडी पोलीस स्टेशनने (Wanwadi Police Station) आज (दि. १९/१०/२०२५) जोरदार दणका दिला आहे. कोंबड्यांच्या झुंजीवर (कोंबडझुंज) पैशांची बाजी लावून जुगार खेळणाऱ्या ६ आरोपींना वानवडी तपास पथकाने जागीच ताब्यात घेतले आहे. जुगार प्रतिबंधक कायद्यासह प्राण्यांना क्रूरपणे वागवल्याप्रकरणी त्यांच्यावर गुन्हा दाखल करण्यात आला आहे. दिनांक १९ ऑक्टोबर २०२५ रोजी वानवडी पोलीस स्टेशनच्या तपास पथकातील पोलीस अधिकारी व अंमलदार पोलीस स्टेशनच्या हद्दीत नियमित पेट्रोलिंग करत होते. त्यावेळी तपास पथकातील पोलीस अंमलदार गोपाळ मदने व अमोल पिलानें यांना त्यांच्या गुप्त बातमीदारांमार्फत एक महत्त्वाची माहिती मिळाली. घोरपडी परिसरातील इम्प्रेस गार्डनच्या पाठीमागे, बंगला नंबर २ जवळ, रस्त्यालगत मोकळ्या जागेत पाच ते दहा इसम पैशांवर कोंबड्यांची झुंज लावून जुगार खेळत असल्याची खात्रीशीर माहिती त्यांना मिळाली. खात्रीशीर माहिती मिळाल्याने तपास पथकाचे अधिकारी व अंमलदार यांनी तात्काळ सदर ठिकाणी धाव घेतली आणि गोपनीय पद्धतीने पाहणी करून खात्री केली. बातमीतील वर्णनानुसारचे इसम त्या नमूद ठिकाणी एकूण ६ कोंबड्यांची झुंज लावून त्यावर पैशांची बाजी लावून ‘हार-जीत’चा जुगार खेळत असल्याचे दिसून आले. यावेळी तपास पथकाने कोणतीही संधी न देता अचानक छापा टाकून जुगार खेळणाऱ्या सहा (०६) आरोपींना जागीच पकडले.

पोलिसांनी त्यांची नावे-पत्ते विचारले असता, त्यांनी त्यांची नावे उघड केली:

1. अमोल सदाशिव खुंदुर्वे (वय ४७, रा. रविवार पेठ, पुणे)
2. मंगेश आप्पा चव्हाण (वय ५५, रा. भवानी पेठ, पुणे)
3. निखिल मनिष त्रिभुवन (वय २०, रा. घोरपडी, पुणे)
4. अमीर अयुब खान (वय २८, रा. घोरपडी गाव, पुणे)
5. सचिन सदाशिव कांबळे (वय ४२, रा. भवानी पेठ, पुणे)
6. प्रणेश गणेश पारम (वय २७, रा. कॅम्प, पुणे)

या सहाही आरोपींनी सदर ठिकाणी पैशांवर कोंबड्यांची झुंज लावून जुगार खेळत असल्याचे कबूल केले. त्यांच्याकडून सदर वेळी ६ रंगीबेरंगी कोंबडे, आरोपींनी वापरलेल्या तंगुसाच्या ६ पिशव्या, ३ मोटारसायकल, ५ मोबाईल हँडसेट, आणि ₹२,५८०/- रोख रक्कम इत्यादी असा एकूण ₹५,११,८८०/- (पाच लाख अकरा हजार आठशे ऐंशी रुपये) किंमतीचा मुद्देमाल हस्तगत करण्यात आला आहे. नमूद सर्व आरोपींविरुद्ध वानवडी पोलीस स्टेशन येथे गु.र.नं. ४२४/२०२५ अन्वये महाराष्ट्र जुगार प्रतिबंधक कायदा कलम १२(ब) आणि प्राण्यांना क्रूरपणे वागणूक देण्याबाबत प्रतिबंध करण्यासंबंधी अधिनियम कलम ११(१)(न) अन्वये गुन्हा दाखल करण्यात आला आहे. सदरची मोलाची कारवाई मा. अपर पोलीस आयुक्त, पूर्व प्रादेशिक विभाग, पुणे शहर श्री. मनोज पाटील, मा. पोलीस उप-आयुक्त, परिमंडळ-०५, पुणे शहर डॉ. राजकुमार शिंदे, मा. सहा. पोलीस आयुक्त, वानवडी विभाग, पुणे शहर श्री. धनकुमार गोडसे यांच्या मार्गदर्शनाखाली व वरिष्ठ पोलीस निरीक्षक, वानवडी पो.स्टे. पुणे शहर भाईसाहेब पाटील आणि पोलीस निरीक्षक (गुन्हे) श्री. विजयकुमार डोके यांच्या सूचनेप्रमाणे पार पाडण्यात आली.

या कार्यवाहीत तपास पथकाचे स.हा. पोलीस निरीक्षक उमाकांत महाडिक आणि पोलीस अंमलदार दगा शेगर, महेश गाडवे, अमोल पिलानें, अतुल गायकवाड, अभिजीत चव्हाण, गतीराम भोसले, आशिष कांबळे, गोपाळ मदने, बाळाजी वाघमारे, विष्णू सुतार, अमोल गायकवाड, विठ्ठल चोरमले, अरशद सय्यद व सुजाता फुलसुंदर या विशेष पथकाने सक्रिय सहभाग घेतला. पुणे पोलीस दलाच्या या तत्परतेमुळे आणि प्रभावी गुप्तवार्ता प्रणालीमुळे अशा सामाजिक दुष्प्रवृत्तींवर वेळीच नियंत्रण मिळवणे शक्य झाले आहे. वानवडी पोलीस स्टेशनच्या पथकाची ही कामगिरी अत्यंत कौतुकास्पद आहे.