खादी एक्स्प्रेस ( ऑनलाईन ) पुणे : पुणे शहर पोलिसांनी चोरी, दरोडा आणि फसवणुकीच्या गुन्ह्यांमध्ये मोठ्या प्रमाणावर जप्ती आणि आरोपींना अटक करून आपली कार्यक्षमता सिद्ध केली आहे. लोणीकंद (Lonikand) पोलीस स्टेशनच्या तपास पथकाने सुमारे ₹३५ लाख ७९ हजार ६६०/- किमतीचा अपहार (चोरी) झालेला कंटेनर ट्रक आणि त्यामधील १२0 फ्रिज नंदुरबार येथून हस्तगत करून एका आरोपीला जेरबंद केले आहे. दिनांक २५/०९/२०२५ रोजी रांजणगाव, ता. शिरूर, जि. पुणे येथील मा. भगवती ट्रान्सपोर्ट कंपनीचा MH-12-TV-1024 क्रमांकाचा कंटेनर ट्रक कटकेवाडी, येथून मारुती वेअर हाऊस येथून एकूण १२० फ्रिज लोड करून व्हर्लपूल इलेक्ट्रॉनिक्स, राजकोट, गुजरात येथे पोहोचवण्यासाठी निघाला होता. परंतु दिनांक २७/०९/२०२५ रोजी सदर कंटेनर ट्रक राजकोट येथे पोहोचला नाही, तसेच कंटेनर ट्रकमधील ड्रायव्हरचा फोन बंद लागत होता. कंटेनरचे जीपीएस लोकेशन गुजरात येथील एकाच ठिकाणी दर्शवत होते. यामुळे ट्रान्सपोर्ट कंपनीच्या मॅनेजरने जीपीएस लोकेशनवर दुसरा कंटेनर ट्रक ड्रायव्हर पाठवला असता, त्यांना नमूद ठिकाणी कंटेनर ट्रक मिळाला नाही. मॅनेजरला कंटेनर ट्रक ड्रायव्हरने ट्रक व त्यामधील मालाचा अपहार केल्याची खात्री पटली. त्यांनी लोणीकंद पोलीस स्टेशनमध्ये एकूण ₹३५,७९,६६०/- (पस्तीस लाख एकोणऐंशी हजार सहाशे साठ रुपये) किमतीच्या १२० फ्रिजच्या अपहाराबाबत गु.र.नं. ३८६/२०२५, भा.दं.वि.क. ३१६(३), ३(५) अन्वये गुन्हा दाखल केला.

सदर गुन्ह्याच्या अनुषंगाने, पोलीस उप-निरीक्षक अर्जुन बेदगुडे व त्यांच्या स्टाफने कंटेनर ट्रक ड्रायव्हरचा कसून शोध सुरू केला. तपास करत असताना, अपहार झालेला हा कंटेनर ट्रक नंदुरबार येथील आर. के. पेट्रोलिंग पंपाजवळ असल्याची माहिती फिर्यादीच्या माध्यमातून पोलिसांना मिळाली. वरिष्ठ अधिकाऱ्यांच्या आदेशानुसार, पो.उप.नि. अर्जुन बेदगुडे व त्यांच्या स्टाफने तात्काळ नंदुरबार येथे धाव घेतली. तिथे त्यांना कंटेनर ट्रक MH-12-TV-1024 हा बेवारस अवस्थेत आढळून आला. पोलिसांनी सदर कंटेनर ट्रक ताब्यात घेऊन जप्त केला. त्यानंतर पो.उप.नि. बेदगुडे व स्टाफने अत्यंत कौशल्यपूर्ण तपास करत गोपनीय बातमीदारामार्फत माहिती प्राप्त करून कंटेनर ट्रक ड्रायव्हरचा साथीदार आरोपी नामे निसार अहमद इसाक खान (वय ३५ वर्षे, रा. शास्त्री मार्केट, मंगळ बाजार, नंदुरबार) याला ताब्यात घेतले. ताब्यात घेतलेल्या आरोपीकडून अपहार झालेला व्हर्लपूल कंपनीचा एकूण १२० फ्रिजचा माल एका खेडेगावातील घरातून हस्तगत करण्यात आला. ₹३५,७९,६६०/- किमतीचा अपहार झालेला सर्व माल जप्त करून आरोपीला दिनांक २२/१०/२०२५ रोजी नमूद गुन्ह्यात अटक करण्यात आली आहे. पुढील अधिक तपास पो.उप.नि. अर्जुन बेदगुडे हे करीत आहेत.

सदरची मोलाची कामगिरी मा. अपर पोलीस आयुक्त, पूर्व प्रादेशिक विभाग, पुणे शहर श्री. मनोज पाटील, मा. पोलीस उप-आयुक्त, परिमंडळ-४, पुणे शहर श्री. सोमय मुंडे, मा. सहाय्यक पोलीस आयुक्त, येरवडा विभाग, पुणे शहर श्रीमती प्रांजली सोनवणे यांच्या मार्गदर्शनाखाली, तसेच मा. वरिष्ठ पोलीस निरीक्षक, लोणीकंद पोलीस स्टेशन, पुणे शहर श्री. सर्जेराव कुंभार यांच्या सूचनेनुसार पार पाडण्यात आली.

या कार्यवाहीत तपास पथकाचे पोलीस उप-निरीक्षक अर्जुन बेदगुडे, पोलीस अंमलदार कैलास साळुंके, सागर जगताप, स्वप्नील जाधव, संतोष अंदुरे, मल्हारी सपुरे, शुभम चिनके, किरण पलांडे, अमोल ढोणे व सुधीर शिवले यांनी सहभाग घेतला. लोणीकंद पोलीस स्टेशनच्या तपास पथकाने या गुन्ह्याचा अतिशय जलदगतीने आणि उत्कृष्ट तपास करून लाखोंचा माल हस्तगत केला, जो पुणे पोलीस दलाच्या कार्यक्षमतेचा व तपासाच्या कौशल्याचा उत्कृष्ट नमुना आहे.