खादी एक्स्प्रेस ( ऑनलाईन ) पुणे : पुणे शहर पोलीस दलाने गुन्हेगारीवर वचक ठेवण्यासाठी अत्यंत प्रभावी मोहिम राबवण्यास सुरुवात केली आहे. याच सतर्कतेचा भाग म्हणून विश्रामबाग (Vishrambaug) पोलीस स्टेशनच्या तपास पथकाने सार्वजनिक ठिकाणी शस्त्रास्त्रांसह फिरणाऱ्या एका सराईत गुन्हेगाराला ताब्यात घेऊन त्याला जेरबंद केले आहे. पोलिसांनी आरोपीकडून सुमारे एक लाख रुपयांहून अधिक किंमतीची दोन गावठी पिस्तूल व एक काडतूस हस्तगत केले आहे. विश्रामबाग पोलीस स्टेशनच्या हद्दीत तपास पथकातील पोलीस अंमलदार आशिष खरात व अनिस शेख हे नियमित पेट्रोलिंग करत असताना, त्यांना त्यांच्या गुप्त बातमीदारांमार्फत गोपनीय माहिती मिळाली. राजेंद्रनगर भाग, विश्रामबाग, पुणे येथील सार्वजनिक रोडच्या कडेला एक इसम संशयास्पद रित्या थांबलेला आहे आणि त्याच्याकडे गावठी पिस्तूल असण्याची शक्यता आहे, अशी खात्रीशीर माहिती त्यांना मिळाली.

सदर अंमलदारांनी मिळालेल्या माहितीचे गांभीर्य लक्षात घेऊन तात्काळ त्या ठिकाणी धाव घेतली आणि तपास सुरू केला असता, एक इसम तिथे थांबलेला दिसला. पोलिसांनी त्याला ताब्यात घेऊन त्याचे नाव-पत्ता विचारला असता, त्याने त्याचे नाव मयूर सचिन भोसले (वय २० वर्षे, रा. पापळ वस्ती, गणपत नगर, बिबवेवाडी, पुणे) असे सांगितले. त्याला ताब्यात घेऊन त्याची झडती घेतली असता, त्याच्याजवळ ₹१,००,२००/- (एक लाख दोनशे रुपये) किंमतीची दोन गावठी पिस्तूल व एक काडतूस आढळून आले.पोलिसांनी तात्काळ ही शस्त्रे जप्त करून आरोपीला अटक केली आहे. आरोपी मयूर भोसले याच्याविरुद्ध विश्रामबाग पोलीस स्टेशनमध्ये गु.र.नं. २९०/२०२५ अन्वये आर्म्स ॲक्ट कलम ३(२५), तसेच महाराष्ट्र पोलीस अधिनियम कलम ३७ (१) (३) सह १३५ नुसार गुन्हा दाखल करण्यात आला आहे. पुढील तपास सहाय्यक पोलीस निरीक्षक राजेश उसगावकर हे करीत आहेत.

सदरची उल्लेखनीय कारवाई मा. अपर पोलीस आयुक्त, पश्चिम प्रादेशिक विभाग, पुणे शहर श्री. राजेश बनसोडे, मा. पोलीस उप-आयुक्त, परिमंडळ-०१, पुणे शहर श्री. कृषिकेश रावले, मा. सहाय्यक पोलीस आयुक्त, विश्रामबाग विभाग, पुणे शहर श्री. साईनाथ ठोंबरे यांच्या मार्गदर्शनाखाली, तसेच वरिष्ठ पोलीस निरीक्षक, विश्रामबाग पोलीस स्टेशन, पुणे शहर श्री. प्रदीप कसबे आणि पोलीस निरीक्षक (गुन्हे) श्री. अरुण घोडके यांच्या सूचनेप्रमाणे पार पाडण्यात आली.

या कामगिरीत सहाय्यक पोलीस निरीक्षक राजेश उसगावकर, पोलीस अंमलदार सचिन कदम, गणेश काठे, शैलेश सुर्वे, सचिन अहिंवळे, अमोल भोसले, जाकीर मणियार, आशिष खरात, अर्जुन थोरात, राहुल मोरे, अनिस शेख, नितीन बाबर, सागर मोरे, शिवा गायकवाड व राहुल माळी या कर्मचाऱ्यांनी सक्रिय सहभाग घेतला. पुणे पोलीस दलाच्या अधिकारी व कर्मचाऱ्यांनी दाखवलेली ही अखंड दक्षता आणि व्यावसायिकता पुणे शहरातील गुन्हेगारीला लगाम घालण्यासाठी अत्यंत मोलाची आहे. सार्वजनिक शांतता भंग करू पाहणाऱ्या व बेकायदेशीर शस्त्र बाळगणाऱ्यांवर विश्रामबाग पोलीस स्टेशनने केलेली ही कारवाई निश्चितच कौतुकास्पद आहे.