खादी एक्स्प्रेस ( ऑनलाईन ) पुणे : पुणे शहर परिसरात गुन्हेगारी प्रवृत्तीच्या व्यक्तींकडून जुन्या भांडणाच्या कारणावरून दहशत निर्माण करण्याचे प्रकार वाढले आहेत. चतुःश्रृंगी (Chaturshringi) पोलीस स्टेशनच्या हद्दीत जुना वाद उकरून काढून एका तरुणाला लोखंडी हत्याराने व लाथाबुक्क्यांनी मारहाण करून जखमी केल्याची गंभीर घटना घडली आहे. दिनांक २४ ऑक्टोबर २०२५ रोजी रात्री ११:१५ वाजण्याच्या सुमारास ही घटना घडली. गोखलेनगर येथील एका टॅक्सी स्टँडच्या जवळ, फिर्यादीच्या घराबाहेर हा हल्ला करण्यात आला.

फिर्यादी (वय ३६ वर्षे, रा. गोखलेनगर, पुणे) व त्यांचे मित्र नमूद ठिकाणी बसलेले असताना, आरोपींनी जुन्या भांडणाचा राग मनात धरून त्यांच्याशी वाद घालण्यास सुरुवात केली. या वादाचे रूपांतर हाणामारीत झाले. आरोपी नामे आकाश गणेश भोंडवे (वय २० वर्षे, रा. रामोशीवाडी, जाधव पान शॉप जवळ, पुणे) आणि त्याचे इतर तीन अनोळखी साथीदार यांनी फिर्यादी व त्यांच्या मित्राला लोखंडी हत्याराने, तसेच हाताने व लाथाबुक्क्यांनी मारहाण करून जखमी केले. आरोपींनी परिसरात दहशत निर्माण करण्याचा प्रयत्न केला. पोलिसांनी तातडीने कारवाई करत मुख्य आरोपी आकाश भोंडवे याला अटक केली आहे, तर उर्वरित तिघांचा शोध सुरू आहे. या गंभीर गुन्ह्याप्रकरणी चतुःश्रृंगी पोलीस स्टेशनमध्ये गु.र.नं. ४२७/२०२५ भा.न्या.सं.क. ११८(२) , ११५(२) , ३५२ , ३(५) आर्म्स ॲक्ट कलम ४, २५ महाराष्ट्र पोलीस अधिनियम ३७(१), १३५ कलमांखाली गुन्हा दाखल करण्यात आला आहे

सदर गुन्ह्याचा तपास सहाय्यक पोलीस निरीक्षक गणेश धामण यांच्याकडे सोपवण्यात आला आहे.

सहाय्यक पोलीस निरीक्षक गणेश धामण आणि त्यांचे तपास पथक या घटनेची गांभीर्याने नोंद घेऊन उर्वरित फरार आरोपींना लवकरात लवकर पकडण्यासाठी युद्धपातळीवर तपास करत आहेत. चतुःश्रृंगी पोलिसांनी बेकायदेशीर शस्त्र बाळगणाऱ्या आणि शांतता भंग करणाऱ्या गुन्हेगारी प्रवृत्तींवर त्वरित कारवाई करून दाखवलेली दक्षता व कठोर भूमिका ही पुणे शहर पोलीस दलाच्या कार्यक्षमतेचे प्रतीक आहे. परिसरातील नागरिकांमध्ये सुरक्षिततेची भावना टिकवून ठेवण्यासाठी पोलिसांचे हे प्रयत्न अत्यंत मोलाचे आहेत.