खादी एक्स्प्रेस ( ऑनलाईन ) पुणे :- पुणे शहरातील भारती विद्यापीठ पोलिस स्टेशनने आंतरराष्ट्रीय देहविक्री आणि मानवी तस्करीच्या एका मोठ्या रॅकेटचा पर्दाफाश केला आहे. पोलिसांनी कारवाई करत दोन बांगलादेशी नागरिकांना अटक केली असून, त्यांच्या तावडीतून एका अल्पवयीन मुलीची सुटका करण्यात आली आहे. पोलिसांनी दिलेल्या माहितीनुसार, १०/१०/२०२५ रोजी सायंकाळी पोलिसांच्या नियंत्रण कक्षाकडून (कॉलिंग नियंत्रण कक्ष) भारती विद्यापीठ पोलिस स्टेशनला एका पीडित महिलेबद्दल माहिती मिळाली. आरोपींनी एका अल्पवयीन मुलीला जबरदस्तीने देहविक्रीच्या व्यवसायात ढकलले असल्याची माहिती कॉलद्वारे प्राप्त झाली होती. मिळालेल्या माहितीनुसार, पोलिस निरीक्षक स्वप्निल पाटील यांच्यासह भारती विद्यापीठ पोलिस स्टेशनच्या पथकाने तात्काळ तपास सुरू केला. तपासादरम्यान पीडित मुलीला शोधून तिच्याकडे अधिक चौकशी करण्यात आली. पीडितेने पोलिसांना सांगितले की, दोन्ही आरोपींनी तिला बांगलादेशमधून ‘ब्युटी पार्लर’मध्ये काम देण्याचे आमिष दाखवून पुणे, महाराष्ट्रात आणले. पुणे शहरात आणल्यानंतर त्यांनी तिला ब्युटी पार्लरचे काम न देता, देहविक्रीच्या व्यवसायात जबरदस्तीने ढकलले.

पीडितेने आरोप केला की, आरोपींनी तिला अंब्रेगाँव पठार भागात एका फ्लॅटमध्ये डांबून ठेवले होते. तसेच, त्यांनी तिचे कागदपत्रे काढून घेत, मारहाण केली आणि पैशांसाठी किंवा काम न केल्यास अश्लील शिवीगाळ करत जीवे मारण्याची आणि नग्न करून छळ करण्याची धमकी दिली. आरोपी हे स्वतःच्या उपजीविकेसाठीही पीडितेच्या कमाईचा वापर करत होते, असे तपासात निष्पन्न झाले. पीडितेच्या तक्रारीवरून भारती विद्यापीठ पोलिस स्टेशनमध्ये गुन्हा रजिस्टर क्रमांक ४६०/२०२५ नुसार भारतीय दंड संहिता कलम १४३, १२७(२), १२७(३), ११५(२), ३५१(२), ३५२, ३(५) आणि अनैतिक व्यापार प्रतिबंधक कायदा १९५६ चे कलम ४, ५, ६ अन्वये गुन्हा दाखल करण्यात आला आहे. गुन्हा दाखल झाल्यानंतर पोलिसांनी तातडीने तपास करत, २४ तासांच्या आत अंब्रेगाँव पठार येथील आरोपींच्या फ्लॅटमधून दोन्ही आरोपींना अटक केली आणि पीडितेची सुटका केली.

गुन्ह्याचा पुढील तपास वरिष्ठ पोलिस निरीक्षक राहुलकुमार खिलारे करत आहेत. सदरची कामगिरी अपर पोलिस आयुक्त (पश्चिम प्रादेशिक विभाग) श्री. राजेश बनसोडे, उपायुक्त (परिमंडळ-२) श्री. मिलिंद मोहिते, आणि सहायक आयुक्त (स्वारगेट विभाग) श्री. राहुल आवारे यांच्या मार्गदर्शनाखाली भारती विद्यापीठ पोलिस स्टेशनचे वरिष्ठ पोलिस निरीक्षक श्री. राहुल खिलारे, पोलिस निरीक्षक स्वप्निल पाटील, उपनिरीक्षक निलेश मोकाशी, अंजली खोब्रागडे, आणि पोलिस अंमलदार सचिन सरपळे, महेश बारवकर, मंगेश पवार, निलेश खैरमोडे, मंगेश गागकवाडे, किरण साबळे, तुकाराम सुतार, संदीप आगले, मितेश चोरमोले, अभिनव चौधरी, सागर बोरगे, नम्रता कवे आणि सोनाली कामठे यांच्या पथकाने पार पाडली.